जेष्ठ ४, २०७३- द्वन्द्वको चपेटाबाट बच्न वैदेशिक रोजगारीमा गएको र हन्डर खाएर फर्किएको एउटा पात्रको कथा पत्रकार अखण्ड भण्डारीको उपन्यास ‘मलाया एक्सप्रेस’ ले भन्छ ।

त्यही मूल कथाको सेरोफेरोमा रहेर झापाको परिवर्तन थिएटरले उक्त उपन्यासलाई नाटकको रूप दियो । रंगकर्मी कविता नेपालको परिकल्पना र निर्देशनमा नाटक प्रस्तुत गरियो ।

प्रहरी कार्यालयमा प्रहरी नायव निरीक्षक (विशाल कँडेल) ले प्रिया (कविता) लाई सोधपुछ गरेको दृश्य सुरुमा छ । ‘फ्ल्यास ब्याक’ मा प्रियाले कथा सुनाएपछि नाटक सुरु हुन्छ । लामो समय माओवादी भएर जंगल पसेका जितबहादुर (अभिषेक गड्र्तौला) को योगदान पार्टीले देख्दैन ।

पार्टीप्रति उसको वितृष्णा जाग्छ । त्यही वितृष्णाका बीच उसले विदेश जाने निर्णय लिन्छ ।

सशस्त्र द्वन्द्वको मारबाट जोगिन जित मलेसिया भासिन्छ । यिनै पात्र मलेसिया भास्सिएपछि पाएको दु:ख, म्यानपावर कम्पनीले दिएको धोका, एजेन्टको चलखेल हुँदैनाटक अघि बढ्छ ।

विदेश जानेहरूको पत्नीको मनोदशादेखि उनीहरूले पाइलै पिच्छे खेप्नुपर्ने समस्या र यौनशोषणको रूपमा फसाउन गलत प्रवृत्तिकाहरूले गर्ने षड्यन्त्र पनि नाटकमा छ । उपन्यासलाई नै नाटकमा रूपान्तरण गरिएको भए पनि नाटकले पुस्तकका सबै विषयवस्तुलाई छोएको छ ।

नाटक हेर्दै गर्दा दर्शकले बितेको दशक नेपाली समाजमा देखिएका परिदृश्यहरूलाई सम्झे । माओवादी जनयुद्ध, निराशा, वैदेशिक रोजगारमा पलायनदेखि पारिवारिक विखण्डन हाम्रै समाजका वास्तविक परिदृश्य हुन् । मलेसियाबाट दु:ख पाएर फर्केका जितबहादुर अनेकथरी प्रलोभन र नक्कली प्रेममा फसेकी पत्नी प्रियाको उद्धारपछि नाटकको सुखान्त अन्त्य हुन्छ ।

नाटकमा सुषमा पोख्रेल, एन्जल खड्का, अनिस बस्नेत, मेघराज खड्का, सरोज दाहाल र लोमश पौडेलको पनि छोटो तर रोचक भूमिका छ । ‘नाटक मलाया एक्सप्रेस धन कमाउन विदेश भासिएका युवा वर्गको संघर्ष, पीडा र आर्तनाद कथा रहेछ,’ झापाका अगुवा रंगकर्मी टंक विकल्पको प्रतिक्रिया थियो, ‘मनछुने कथामा रोचक प्रस्तुति पाइयो ।’

काँकडभिट्टा खानेपानी कार्यालयका सभाहलमा हाउसफुल दर्शक थिए । १ सय, २ सय, ५ सय र हजार रुपैयाँको टिकट काटेर दर्शक आएका थिए । ‘झापामा थिएटर कल्चरको खाँचो थियो अब पूरा भएको महसुस भयो,’ रिडर्स झापाका सदस्य दीपक पोख्रेलले सुनाए, ‘थिएटर कल्चरलाई निरन्तरताको खाँचो छ ।